Sheeko Kale: Nafyahay Ku Maan …
Cabdisalaam Yaasiin
Nafyahay Ku Eegoo
Nafyahay ku eegoo arrinkaaga maan garan!
Ashahaadadaan qari hadana waan inkirayaa
Alle keliya mooyee inaan jirin ilaahyaba
Afka waad ka leedahay hadana uurku may gelin
Waxa aad adeeecdaa asnaam kuu qarsoodiye.
Nafyahay ku eegoo arrinkaaga maan garan!
Ilaahay siduu yidhi amaanadu xill weeyaan
Ay tahay in loo dhaqo ehelkii iska lahaa
Adiguna afduubtoo aqalkaaga dhigatoo
Ummadii lahaydna irridaha ka xidhatoo
Ciddii eray tidhaadana afka lagaga boodyoo
Aamusna waxaa xigay xadhig lagu arjume.
Nafyahay ku eegoo arinkaaga maan garan!
Uunka waxa asaas u ah garsoor Eebbe dhigayoo
Amiir iyo mid maato ah loo simay awoodoo
Mid waliba ayantii uu ka heli abaalkii
Adna waxad is leedahay nololi waa aduunkoo
Aanay jirin xisaabahan akhriyaan wadaadu
Ee isin iyo awood iyo aduun buuran meel dhigo.
Nafyahay ku eegoo arrinkaaga maan garan!
Anshaxii lagaa rabay adhaxdaad ka jebisoo
Dawladnimo asluubteed albaabkaad ka saartoo
Eex iyo qaraabana astaan baad ka dhigatoo
Adeeg iyo wax qabadna cidi kaama eegtoo
Ambatoo xidh oodana waadigaa la aadoo
Ayax iyo dugaag baa carro edeg ka dhigayoo
Aafadaad ku reebreen ubadkay sugaysaa.
Nafyahay ku eegoo arrinkaaga maan garan!